26, 27 და 28 ივნისს, ქუთაისში, ვერიკო ანჯაფარიძის სახელობის სკვერში, გასტრონომიული ფესტივალი GEMO FEST 2026 გაიმართება. ფესტივალის მთავარი პარტნიორი საქართველოს აეროპორტების გაერთიანებასთან ერთად, ქუთაისის საერთაშორისო აეროპორტია. დავით აღმაშენებლის სახელობის აეროპორტი ღონისძიებას უკვე მეოთხედ უერთდება და ტურიზმის ეროვნულ ადმინისტრაციასთან ერთად მისი ერთ-ერთი მასპინძელია.

GEMO FEST-ის მთავარი მიზანია იმერეთში შიდა და საერთაშორისო მოგზაურების ნაკადების ზრდის ხელშეწყობა, გასტრონომიული ტურიზმის განვითარება და ადგილობრივი კულინარიული კულტურის პოპულარიზაცია.

GEMO FEST-ის ფარგლებში იმერეთის სტუმრებს შესაძლებლობა ექნებათ დააგემოვნონ როგორც ტრადიციული, ასევე იშვიათი და ნაკლებად ცნობილი იმერული კერძები, გაეცნონ რეგიონის კულინარიულ მემკვიდრეობას და იმერული სტუმართმოყვარეობის განსაკუთრებულ გარემოს.

3 დღის განმავლობაში, ყველაზე გემრიელი ფესტივალი ადგილობრივ მეწარმეებს, კულინარიის მოყვარულებსა და იმერეთის სტუმრებს ერთ სივრცეში გააერთიანებს.